فرض اور قرض ۔ ۔ ۔

سلام اور دعائیں ۔ سب کا بھلا سب کی خیر 

عزیزانِ گرامی صدیوں سے پوری دنیا کا بالعموم اور عالمِ اسلام کا بالخصوص یہ المیہ رہا ہے کہ میانہ روی، منصفانہ اور مبنی بر منطق مکالمہ  عنقا ہو گئے۔ سطحی علم، منافرت زدہ رویے اور بیجا ہوسِِ مال و جاہ  نے تعمیری سوچ اور بردباری کو بربادی سے دوچار کر دیا ہے۔

کرونا وائرس ایک دور رس نتائج کی حامل آفتِ ناگہانی  ہے۔ اِس کا مقابلہ، صبر، دعا، دوا اور احتیاط ہی سے ممکن ہے، لیکن ایک طرف چند عصری تعلیم سے نابلد نام نہاد علما اور دوسری طرف  کدورتوں سے مغلظ دین اور دینی تعلیم سے ناآشنا طبقے  کی  قلمی، عملی اور زبانی موشگافیاں حیران کئے دیتی ہیں۔ کوی کرونا کے وجود یا اس کے خوفناک اثرات کو جھٹلا رہا  ہے، کسی کو تنقید براے تنقید سے فرصت نہیں  تو کوی ناجائز ذخیرہ اندوزی اور ظالمانہ منافع خوری میں مصروف نظر آتا ہے۔


وجہ ظاہر ہے ۔۔علمِ صحیحہ کا فقدان۔ ہر شخص کے لیے ذاتی نمُو اہم ترین ہے۔ سرمایہ، ثروت، لذات و جاہ و منصب دیوانہ بناے ہوے ہیں۔ اس دوڑ میں پاکیزہ اخلاقی قدریں پامال ہو رہی ہیں۔ روحانیت اور خدا خوفی کے رخِ زیبا مسخ ہو رہے ہیں اور ماحولِ دنیا، طمع و حرص اور حسد و نفاق کی آلائشوں سے متعفن ہے۔ 

یاد رکھیے کرونا کے خلاف جنگ  کوی  مذہبی، مسلکی یا سیاسی جنگ نہیں۔ ۔ ۔ یہ انسانیت کی جنگ ہے، اس میں جیت انسانیت کی جیت اور اس میں ہار انسانیت کی ہار ہے۔

ایسے نازک موڑ پرثقہ صاحبانِ علم وسوچ کا یہ فرض بھی ہے اور قرض بھی کہ وہ اپنی جملہ علمی، عملی اور روحانی صلاحیتوں کو بروے کار لا کر انسانیت کی تربیت کا مقدس فریضہ سر انجام دینے کے لئے کمر باندھ لیں۔

 جہالت و نفرت کی بدبودار و تاریک وادیوں کو علمِ حقانی سے منور کریں اور قوم کو تیار اورسنبھالنے میں اپنا قائدانہ اور مومنانہ کردار ادا کریں۔  

AKHTAR N JANJUA

http://anjanjua.blogspot.com
http://www.facebook.com/akhtar.janjua
https://twitter.com/IbneNawaz

https://www.youtube.com/channel/UCcWozYlUgu-bkQU_YcPoxTg?view_as=subscriber

https://www.pinterest.com/akhtarjanjua
https://www.linkedin.com/in/akhtar-janjua-90373825