سلام اور ڈھیروں دعائیں

 دوستو سوچ رہا ہوں شاید اسی لئے شاعر پکار اٹھا تھا کہ "مُنیر اس ملک پر آسیب کا سایہ ہے یا کیا ہے" کہ  سفر شروع ہوتا نہیں کہ  کھائیوں میں جا اترتا ہے۔ رہنماوں کی آنکھیں، اور شاید روح و خرد بھی طاقت کی چکا چوند سے اس طرح چندھیاتی ہیں کہ اُن کی تمام اکتسابی اور طبعی صلاحیتیں معدوم ہو جاتی ہیں، رہزن انھیں گھیر لیتے ہیں اور مملکتِ خداداد پر  تو جس کا بھی بس چلا اُسی کے لئے ایک چراگاہِ  دوام۔

افراتفری  ہمارا نصب العین نہیں تھا 

 ہمیں  تو  مثال بننا تھا دنیا کے لیئے اور رہنمای فراہم کرنی تھی عالمِ  اسلام  کو 

قران و سنت کو ہمارا اوڑھنا بچھونا ہونا تھا 

خطبہِ وداع ہماری مشعلِ راہ اور آئینِ ریاستِ مدینہ ہمارا سفینہ، علم و حلم و رواداری ہماری پہچان  اورصدق و صفا و امانت و دیانت کو ہمارا نشان ہونا تھا۔

 لیکن ہوا کیا؟  جھوٹ، بد دیانتی، اقرباپروری، تعدی و تعمل، ظلم و کینہ پروری، قتلِ انصاف اور نفاق و افتراق  نے ہمیں جکڑ لیا۔آلہِ کار ہم بنے، ہوس و ہوا نے ہمیں گھیرا، تکبر و ریا نے ہمیں دبوچا ۔ ۔ سنسنی، تخریب، ریاست کے خلاف زبان درازی، قوم کی شہہ رگ اداروں کے خلاف  نفرت و دشنام ایوانوں میں اور خیابانوں پر، نہ درسگاہیں محفوظ نہ شاہراہیں ۔ 
مُوردِ الزام شیطان یا پھر سامنے والا انسان ۔ ۔ ۔ الامان الامان الامان۔

کشمیر جل رہا ہے اور یہاں ہم نے کچھ ایسا سماں باندھ دیا ہے کہ ذکرِ کشمیر خبروں کے بلیٹنز میں آخر میں چند حرفی جگہ پا رہا ہے۔ پرائم ٹائم ٹی وی سے تو مکمل غائب کیونک وہاں سیاسی مناظروں، کشمکشوں اور آلائشوں سے ہی فرصت نہیں۔ ہوے تم دوست جس کے ۔ ۔ ۔ ۔

میں اپنی ایک ادنی (مگر عشروں پر محیط) ذاتی کاوش ِ اتحاد و سربلندی  کو بھی بتِ انا اور اور دیویِ دھنا کی بھینٹ چڑھتے دیکھ رہا ہوں۔ لیکن "وہ اپنی خُو نہ چھوڑیں گے ہم اپنی وضع کیوں بدلیں" کے مصداق اپنی ڈگر  پر قائم رہنا ہے۔ اللہ کریم استقامت بخشے۔

AKHTAR N JANJUA

http://anjanjua.blogspot.com
http://www.facebook.com/akhtar.janjua
https://twitter.com/IbneNawaz

https://www.youtube.com/channel/UCcWozYlUgu-bkQU_YcPoxTg?view_as=subscriber

https://www.pinterest.com/akhtarjanjua
https://www.linkedin.com/in/akhtar-janjua-90373825

سلام اور دعائیں ۔ ۔ ۔

خیر و شر، امتحان و ڈر، نُور و ظلمات، دن اور رات سب ساتھ ساتھ۔


اچھائ کی ترغیب بھی بہت اور برائ کی تحریک  بھی پیہم۔


بدن کی حفاظت و خوبصورتی کے بڑے جتن لیکن روح و بطن کی ترویج و پرورش  اُ س سے اہم۔

یاد رکھنے کے باتیں:۔

خداوندِ ذوالجلال کے بتلاے ہوے رستے پر چلنے والوں کا خداوندانِ باطل کچھ بگاڑ نہیں سکتے کیونکہ فرمان، الہی ہے کہ حزن و خوف اُن کے نزدیک آ ہی نہیں سکتا۔

کام کے وقت کام اور رکوع و سجود کے اوقات پر اخلاص میں دارین کی مشکلاتِ کلیہ کا حل موجود۔ دینی اور دنیاوی مقاصد سے خلوص بطریقہِ محمدی تو فلاح کے علاوہ کچھ اور ظہور ہی نہین ہوسکتا۔ 

 رضا رب کی تسلیم ہماری۔ ۔ ۔ یہ شیوا بن جاے تو سکونِ قلب و روح یقینی، حالات جیسے بھی ہوں۔ 

انسانی رویوں سے الجھنا صرف  الجھاو ہی پیدا کر سکتا ہے۔انسانوں کی طرف سے ناقدری پر کڑھنا ضیاعِ وقت ہے۔ قدر و درجات وہی جو اللہ کریم عطا فرماے۔

قابل بھروسہ اور پرخلوص احباب عطیہِ خداوندی ہوتے ہیں۔ ذاتی اغراض و مقاصد کی نظر ایسے قیمتی اثاثوں کو کر دینا ناشکری ہے  جس کا لازمی ثمر محرومی و مایوسی نکلتا ہے۔

لبِ لباب ۔ ۔ ۔ ستارُ العیوب و علامُ الغیوب و غفار الذنوب  سے  معاملات درست ہو جائیں تو فوز العظیم۔