الہی خیر گردانی ۔۔۔

 سدا سلامت پاکستان ۔ تا قیامت پاکستان

الہی خیر گردانی ۔۔۔

خبر پڑھی کہ سعودی عرب میں گدا گروں کے خلاف مہم میں سینکڑوں گرفتار کر لیے گئے ہیں۔ سر شرم سے جھکا کہرہورٹ کے مطابق ان میں نوے فیصد پاکستانی ہیں۔ 

کیوں؟

کیسے؟

کس لیے؟

پاکستان عطیہ خداوندی

معدنی ذخائر کا منبع

پھولوں، پھلوں اور زرعی اجناس کا نخلستان

مرغزاروں، میدانوں، فلک پوش چٹانوں، صحراوں، دریاوں کا دیس

یزدانی اور انسانی وسائل کا خزینہ

پھر کیوں وطن کے اندر ہر چوک، ہر منڈی، ہر رستے، ہر بازار، ہر در پر کھڑے ہاتھ بڑھاے، دامن پھیلاے مانگنے والے قطاراندر قطار ۔۔۔۔ 

اور اب بدیس میں بھی؟

اس لیے کہ جہاں “ذات” دین، آئین،ایمان، پیمان اور پاکستان سے بڑی ہو

جہاں رہنماوں کو لوٹنے کی پڑی ہوں

جہاں انصاف “ہاتھ کی میل” ۔۔۔ اور ۔۔۔ “گُرز کی تال” پر بٹتا ہو

جہاں غریب انصاف کے لیے عمر بھر بھٹکتا ہو،سرپھٹکتا ہو

جہاں وطن کو سمجھے 

ہر لٹیرا، فصلی بٹیرا

ایمان فراموش، ضمیر فروش

اپنی چراگاہ اور کھل کھیلنے کے لیے محفوظ پناہ گاہ ۔۔۔ 

وہاں نُور کا دخُول کیسے ہو؟ 

ظلمات کا خروج کیسے ہو؟ 

خوشحالی کیسے بھگاے بد حالی کو؟

سوال ابھرتے ہیں تو ذہن جاتا ہے 

بڑے بڑے ایوانوں میں

تاریخ کے کُوڑا دانوں میں ۔۔۔ 

کُلُ من علیہا فان ۔۔۔اور ۔۔۔ الیوم نختم علی افواہہم پر ۔۔۔

الہی خیر گردانی۔ ۔۔۔

 اندھیر ہی اندھیر

ایک طرف ناچتے ساے

دم ہلاتے دوپاے 

اور دوسری طرف سسکتا بلکتا پاکستان ۔۔۔

کچھ نمک سے بھری تھیلیاں کھولیے 

پھر میرے گھاؤ کی پٹیاں کھولیے 

میرے پر تو کتر ہی دئے آپ نے 

اب تو پیروں کی یہ رسیاں کھولیے 

پہلے آہٹ کو پہچانئے تو سہی 

جلد بازی میں مت کنڈیاں کھولیے 

بھیج سکتا ہے کاغذ کے بم بھی کوئی 

ایسے جھٹکے سے مت چٹھیاں کھولیے 

جس کو بکنا ہے چپکے سے بک جائے گا 

یوں کھلے عام مت منڈیاں کھولیے

اور  ہر پاکستانی کے لیے (بزبانِ شاعر) - - - 

بدل دے بادۂِ  کہنہ بدل دے ساغرِ گل کو 

بدل دے طرزِ مے نوشی بدل دے رنگِ محفل کو

بدل دے قصۂِ مجنون پابندِ سلاسل کو 

بدل دے داستانِ  کہنۂ لیلیٰ محمل کو 

بدل دے گلشنِ ہستی کے خونیں لالہ زاروں کو 

بدل دے محفلِ عشرت کے کہنہ بادہ خواروں کو 

بدل دے کہکشاں کو چاند کو سورج کو تاروں کو 

بدل دے ان سبھی فرقت کے جھوٹے غم گساروں کو 

بدل دے اک نئے انداز میں رفتارِ فطرت کو 

بدل دے اک نئی تنظیم میں پیکارِ فطرت کو 

بدل دے کیف آگیں لطف میں آزارِ فطرت کو 

بدل دے بربط ہستی کے ہر اک تارِ فطرت کو 

یہ راز کامرانی ہے اسی میں کامیابی ہے 

یہاں ہر دم تغیر ہے یہ فطرت انقلابی

ا ن ج