زندگی کا سفر ۔۔۔
ایک اور چوبیس مئی !
ایک سال اور بیت گیا !
صد شکر، پائندہ پیار، پاکیزہ فکر
پلک جھپکنے میں بِیت جانے والا سفر،
کبھی سیدھا، کبھی بل کھاتا،
کبھی ڈھلوانوں پہ اترتا،
کبھی بلندیوں پہ چڑھتا۔
زندگی کی یہ کتاب،
کچھ اوراق خوشیوں سے جگمگاتے،
کچھ صفحات دکھوں سے بھیگے،
مگر ہر ورق پر اللہ کے کرم کی چھاپ۔
ایک عجب داستان...
رب کریم کے بے پایاں فضل میں لپٹی ہوئی،
محبوبِ خدا ﷺ کی شفاعتوں سے سجی،
بزرگوں کے دروسِ علم سے منور،
ماں باپ کی دعاؤں کی برکتوں سے مہکتی،
بھای بہنوں کے انمٹ پیار میں گندھی،
بیوی بچوں کی چاہت کی چھاؤں میں پلی،
خاندان کی عزت کی چادر اوڑھے،
دوستوں کے ہمالیہ جیسے خلوص سے سنورتی...
یہ داستان ۔۔۔ میری داستان۔
“نکا جیہا موہڑا، پڑیاں اتے گراں ماہیا"
کوہستانِ نمک کی گود میں لپٹے ونہار کے گاوں بھسین میں جنم لیا،
محبتوں کی خوشبو بکھیرتی کہانیوں میں پلا،
کبھی رنجشیں،
کبھی قہقہے،
کبھی بچپن کی شرارتیں،
کبھی جوانی کے سپنے...
پھر زندگی نے کئی موڑ لیے،
کتنے پیارے راہوں میں بچھڑ گئے،
کتنے انجانے، اپنے بن گئے۔
میں اور میرا قافلہ...
رواں دواں رہا،
کچھ ساتھ چھوٹ گئے،
کچھ نئے مل گئے،
ہاتھوں میں ہاتھ،
دل میں دل،
یہ سفر نہ رُکا،
نہ رُکے گا۔
اس کہانی کو لفظوں میں بیان نہیں کیا جا سکتا،
یہ تو ایک احساس ہے،
جو سینے میں دھڑکتا ہے۔
شکر... بے شمار، بے پناہ
لاکھ بار کہوں،
پھر بھی کم ہے،
کیونکہ جس کی کوئی انتہا نہ ہو،
اسے گنا کیسے جائے؟
شکر ہے اُس ذات کا،
جس نے ہر سانس میں رحمت بھر دی،
ہر لمحہ نوازا،
ہر پل سنوارا۔
شکر ہے اُن رشتوں کا،
ان دوستیوں کا
ان تعلقات کا
جو خوشبو بن کر میرے وجود میں بس گئے۔
شکر ہے اُس عزت و رزق کے لئے جو بے حساب ملے۔
شکر ہے بے پایاں فضلِ ربی اور اُس مقدر کا،
جو میرے ساتھ چلے۔
شکر اس لامحدود پیار و محبت و شفقت کے لئے
جو پوری زندگی سایہ بن کے ساتھ رہے۔
شکر اس فکر کے لئے جو “المنقذ من الضلال” کا باعث بنی۔
شکر اپنے پاکستان کے لئے کہ جس کے لئے ہمیشہ میرے لبوں پہ پیار بھری دعا رہی،
“سدا سلامت پاکستان - تا قیامت پاکستان”
اور اب... دعا ہے
جیسے “وڈی ماں”، نانی اماں کہا کرتی تھیں ۔۔۔
“اللہ زندہ رکھیں عزت تے شان نال،
موت دئیں ایمان نال"۔
یہی سوالِ درگاہ ہے،
یہی التجا ہے۔
آمین بجاہِ رحمت العالمین صلی اللہ علیہ وسلم
اختر جنجوعہ
No comments:
Post a Comment